Armeniëfonds in de media

«Հայաստան» համահայկական հիմնադրամ.

Այս տարի նվիրատվությունների աճ է նկատվել

09.12.2009

«Այս տարվա հեռուստամարաթոնի ընթացքում հավաքված գումարների շուրջ 70 տոկոսն ուղղվելու է Շուշիի վերականգնման աշխատանքներին՝ խմելու ջրի ջրագծերի, գրադարանի, մշակույթի տան եւ այլ հաստատությունների խնդիրները հոգալու համար»,- դեկտեմբերի 9-ին լրագողների հետ հանդիպման ժամանակ հայտարարեց «Հայաստան» համահայկական հիմնադրամի գործադիր տնօրեն Արա Վարդանյանը։

Նշելով, որ իրենք անում են ամեն բան, որպեսզի հեռուստամարաթոնն իսկապես համահայական դառնա եւ դրան մասնակցեն աշխարհի բոլոր հայերը, նա նկատեց, որ դա, թեպետ, այնքան էլ հեշտ չէ։ Այնուամենայնիվ, դատելով այս տարվա տվյալներից՝ լրիվ հնարավոր է։ «Սփյուռքի մասնակցությունն այս տարի, օրինակ, երկու անգամով ավելացել է։ ԱՄՆ-ում նվիրատվությունների 18 տոկոս աճ է նկատվել։ Նվիրատվություններ են արվել նաեւ Ֆրանսիայում կազմակերպված հեռախոսամարաթոնի ընթացքում, որին մասնակցել են Ֆրանսիայի, Գերմանիայի եւ Շվեյցարիայի ավելի քան 12 հազար 400 ընտանիքներ, ինչը 10 տոկոսով ավել է անցած տարվա տվյալներից։ Իսկ Մոսկվայի բարեգործական ճաշկերույթի ժամանակ 5 մլն դոլարից ավելի գումար է հավաքվել։ Հայաստանում հեռուստամարաթոնի բաղկացուցիչ մաս կազմող SMS քեարկությանը, օրինակ, մասնակցել է 12 հազար մարդ, Հայփոստի տարբեր բաժանմունքներում նվիրատվություններ են արել 15 հազար քաղաքացիներ»,- տեղեկացրեց նա։

Անդրադառնալով սփյուռքահայ եւ հայաստանաբնակ գործարարների կողմից այս տարի արված նվիրաբերությունների թեմային՝ Արա Վարդանյանը նշեց, որ «Հայաստանում եւ ԼՂՀ-ում չի գտնվել մի գործարար եւ պաշտոնյա, ով չի մասնակցել դրամահավաքին»։ Նրա խոսքով, «նախորդ տարվա հեռուստամարաթոնին ամենամեծ նվիրաբերության (15 մլն դոլար) հեղինակ Սամվել Կարապետյանն այս տարի „Հայաստան“ համահայկական հիմնադրամին փոխանցել է 1 մլն դոլար, ՀՀ գործող նախագահ Սերժ Սարգսյանի աշխատակազմից փոխանցվել է մոտ 8 հազար դոլար, երկրորդ նախագահ Ռոբերտ Քոչարյանը, նախկինի նման, նվիրաբերել է իր՝ այդ ամսվա աշխատավարձը, իսկ նրա որդին՝ Սեդրակ Քոչարյանը՝ 1 մլն դրամ է նվիրաբերել։ 15 մլն դրամ է փոխանցել „Ֆլեշ“ ընկերությունը, իսկ ԱԺ պատգամավոր Սամվել Ալեքսանյանը, ով նախորդ տարի հիմնադրամին 1 մլն դրամ էր փոխանցել, այս տարի նվիրաբերել է 200 հազար դրամ»։ Ոլորտի պատասխանատուի խոսքով, այս տարվա հեռուստամարաթոնին չի մասնակցել խոշոր գործարար, «Բարգավաճ Հայաստան» կուսակցության նախագահ Գագիկ Ծառուկյանը։

NEWS. am-ի հարցին, թե ինչո՞վ կբացատրի փաստը, որ նախորդ տարվա համեմատ, նվիրաբերություններն, այնուամենայնիվ, այս տարի զգալիորեն նվազել էին, հիմնադրամի գործադիր տնօրենը նշեց, որ դրա պատճառը, հնարավոր է, համաշխարհային ֆինանսատնտեսական ճգնաժամն է եղել, բայց ոչ երբեք անվստահությունը հիմնադրամի աշխատանքների հանդեպ։ Որպես ասվածի վկայություն՝ Արա Վարդանյանը տեղեկացրեց, որ այս տարի առաջին անգամ հիմնադրամը Ֆրանսիայից եւ Մեծ Բրիտանիայից նաեւ 2 կտակ է ստացել՝ համապատասխանաբար 1.5 մլն եւ 1 մլն եվրո գումարի չափով։

“”Հայաստան” համահայկական հիմնադրամը միայն ամեն տարի կազմակերպվող հեռուստամարաթոնը չէ, այլ իրենից շարունակական, մեծ աշխատանք է ներկայացնում”,- եզրափակեց Արա Վարդանյանը։

Լուրեր Հայաստանից – NEWS.am

«ԱԶԳ» ՕՐԱԹԵՐԹ #92, 21-05-2009

ԳՅՈՒՂԱԿԱՆ ՀԱՄԱՅՆՔՆԵՐԻ ԾՐԱԳԻՐԸ ԻՐԱԿԱՆԱՑՎՈՒՄ Է ՏԱՎՈՒՇԻ ՄԱՐԶՈՒՄ

ՄԱՐԻԵՏԱ ՄԱԿԱՐՅԱՆ, Տավուշի մարզ

 

Կառավարության մշակած գյուղական համայնքների զարգացման ծրագիրը առաջինը ներդրվեց Տավուշի մարզում: «Հայաստան» համահայկական հիմնադրամի հոգաբարձուների խորհրդի 18-րդ նիստից առաջ հիմնադրամի ներկայացուցչական խումբը 14 երկրների տեղական մարմինների պատասխանատուներ, առաջին ամգամ այցելեց մարզ ու տեղում ծանոթացավ իրենց համայնքների գումարներով կառուցվող եւ իրականացվող ծրագրերին: Հյուրերին ընդունեց մարզպետ Արմեն Ղուլարյանը եւ ծանոթացրեց մարզում իրականացվող ծրագրերին:

Մարզի Խաշթառակ, Ակնաղբյուր, Դիտավան համայնքները գրեթե նույն խնդիրները ունեն` չկան խմելու, ոռոգման ջուր, գազաֆիկացում, բուժհաստատություն, վերանորոգված դպրոց: Ակնաղբյուրի 67 հա վարելահողերից միայն 27 հա-ն էր մշակվում ոռոգման ջրի բացակայության պատճառով: «Հայաստան» համահայկական հիմնադրամի ԱՄՆ Արեւելյան շրջանի տեղական մարմնի եւ Կանադայի հանձնախմբի ջանքերով 37.434.000 դրամ արժողությամբ իրականացվել է 1600 մետր երկարություն ունեցող ոռոգման ջրատարի կառուցումը, ինչը հիմնովին կլուծի սահմանամերձ գյուղի ոչ միայն ոռոգման, այլեւ հետագայում խմելու ջրի խնդիրը: Ակնաղբյուրի կենտրոնում էին հավաքվել համայնքի բնակչությունը, աղուհացով դիմավորելու Գուգարաց թեմի առաջնորդ Սեպուհ արք. Չուլջյանի, մարզպետի ու հոգեւոր հովվի գլխավորությամբ ժամանած հյուրերին:

Մարզպետը շնորհակալական խոսք հղեց բարերարներին ու Մայր աթոռ սբ. Էջմիածնին` հանձինս Վեհափառ հայրապետի, որի աջակցությամբ իրականացավ գյուղի գազաֆիկացումը: Բարերար Րաֆֆի Ֆեստեկչյանն ու հիմնադրամի տնօրենի պաշտոնակատար Արա Վարդանյանն էլ տրվեց գազի մուտքը մարզ ազդարարող ջահը վառեցին: Ոգեւորությունն ու տոնախմբությունը շարունակվեց, երբ պտտվեց ոռոգման ջրի փականը եւ խմելու ջուրը քչքչալով մտավ համայնք:

Ոգեւորությունը շարունակվեց Խաշթառակում, որտեղ մեծ շուքով բացվեց բուժկետը, որը մոտ 37 տարի առաջ էր կառուցվել: 322 քմ մակերեսով երկհարկանի շենքում այսօր տեղադրված են 13 կաբինետներ վերազինված սարքավորումներով: Վերանորոգումը իրականացրել էին Նիդեռլանդների տեղական մարմինի հանգանակած 36.770.000 դրամով: Հոլանդիայի կառույցի ղեկավար Նուբար Սեպոյանը (Սիփան) կտրեց շենքի մուտքի կարմիր ժապավենը, որից հետո թեմի առաջնորդ Սեպուհ սրբազանը օրհնեց ու օծեց կառույցը: Խաշթառակի 250 աշակերտ ունեցող դպրոցը նոր ուսումնական տարին կսկսի հիմնանորոգված դպրոցի 3 մասնաշենքերում, որտեղ դեռ շարունակվում էին շինարարական աշխատանքները:

Ինչպես տեղեկացրեց պրեն Վարդանյանը, դեռ բազմաթիվ ծրագրեր կան, որոնք հովանավորության կարիք ունեն:

Հյուրերը այցելեցին նաեւ զորավար Վարդան Մամիկոնյանի սրբավայր դարձած ծառին ու նորակառույց մատուռում մասնակցեցին մոմավառությանը, աղոթեցին: Մարզից գոհ ու կատարված աշխատանքներից երջանիկ հյուրերը վերադարձան Երեւան` մտքներում նոր ծրագրեր իրականացնելու երազանքներով: